នៅថ្ងៃចន្ទទី១១ខែកក្កដានេះ រដ្ឋាភិបាលនៃប្រទេសកម្ពុជា ប្រកាសដាក់អោយដំណើរការផ្សារភាគហ៊ុន កម្ពុជាជាផ្លូវការប៉ុន្តែនេះជាការបើកផ្សារដំបូង។ តើអ្វីទៅជាផ្សារដំបូង? តើរដ្ឋាភិបាលចាប់ផ្តើមគិតគូរបើកផ្សារហ៊ុននេះតាំងពីពេល ណាមក? សូមអញ្ជើញស្តាប់បទសម្ភាសន៍រវាង គី សុខលីមនិងលោក បណ្ឌិត ឃង្ទី សំ អតីតសាស្ត្រាចារ្យហិរញ្ញវត្ថុនិងមូលបត្រនៅសហរដ្ឋអាមេរិកនិង បច្ចុប្បន្នជានាយករងនៃវិទ្យាស្ថានហិរញ្ញវត្ថុកម្ពុជា៕
http://khmer.phnompenhpost.com/index.php?option=com_content&view=article&id=61421:2011-07-10-20-42-56&catid=2:business-news&Itemid=77
ភ្នំពេញ: ផ្សារហ៊ុនកម្ពុជានឹងបើកដំណើរការជាផ្លូវការនៅថ្ងៃនេះ បន្ទាប់ពីបានគ្រោងទុក និងពន្យារពេលជាច្រើនឆ្នាំមក។ ទោះបីជាយ៉ាងនេះក្តី កាលពីម្សិលមិញ អ្នកនៅក្នុងវិស័យនេះបានឲ្យដឹងថា ការធ្វើពាណិជ្ជកម្មភាគហ៊ុនមិនទាន់ដំណើរការបាននៅឡើយ ដោយរង់ចាំរហូតដល់ចុងឆ្នាំនេះ។ ប៉ុន្តែមន្ត្រីរដ្ឋាភិបាល វិនិយោគិន និងសាស្ត្រាចារ្យសេដ្ឋកិច្ចជាច្រើនបានអបអរសាទរចំពោះការបើកផ្សារ ហ៊ុននេះ ដោយអ្នកទាំងនោះ បានឲ្យដឹងថា វាអាចជួយបង្កើនតម្លាភាពនៅក្នុងប្រទេសនេះ ហើយត្រួសត្រាយផ្លូវថ្មីសម្រាប់ធ្វើឲ្យមានកំណើនសេដ្ឋកិច្ច។
លោក Han Penh Kwang នាយកប្រចាំប្រទេសរបស់ធនាគារពាណិជ្ជកម្ម Hwang DBS បានលើកឡើងអំពីសក្តានុពលរបស់ផ្សារហ៊ុន ដល់ក្រុមហ៊ុន និងវិនិយោគិនក្នុងស្រុក។
លោកថ្លែងថា៖ «វាជាការល្អសម្រាប់ក្រុមហ៊ុនក្នុងស្រុក ដោយសារបច្ចុប្បន្ន ក្រមហ៊ុនទាំងនោះអាចចេញលក់ ភាគហ៊ុន សម្រាប់បង្កើនទុនយកទៅពង្រីកអាជីវកម្ម។ ការធ្វើបែបនេះមានតម្លៃថោកជាងយកប្រាក់កម្ចីពីធនាគារ»។ លោកបានបន្ថែមទៀតថា៖ «វិនិយោគិនក្នុងស្រុកនឹងមានជម្រើសផ្សេងទៀត សម្រាប់ការវិនិយោគរបស់ខ្លួន ខណៈពួកគេ ជាធម្មតា បានបណ្តាក់ទុកលើអចលនវត្ថុ ឬយកលុយដាក់ក្នុងធនាគារ។ ដូច្នេះពួកគេ មានមធ្យោបាយផ្សេងទៀតសម្រាប់វិនិយោគ»។
លោក Han Peng Kwang កត់សម្គាល់ឃើញថា ឧស្សាហកម្មធនាគារ និងផ្សារហ៊ុន បានសហការគ្នា ដើម្បីជំរុញទីផ្សារមូលធននៅក្នុងប្រទេស។
ទន្ទឹមនឹងនេះដែរ លោកស្រី សេង វួចហ៊ុន នាយកក្រុមហ៊ុនច្បាប់ កម្ពុជា អាស៊ី បានឲ្យដឹងថា ផ្សារហ៊ុនកម្ពុជាអាចជំរុញស្តង់ដារគណនេយ្យដែលចាំបាច់នៅកម្ពុជា។ លោកស្រី បានបន្ថែមថា៖ «វានឹងក្លាយទៅជាកត្តាជំរុញធ្វើឲ្យមានតម្លាភាព និងការធ្វើរបាយការណ៍ហិរញ្ញវត្ថុសមស្រប ពិសេសវានឹងជួយជំរុញឲ្យក្រុមហ៊ុនបង់ពន្ធ និងគោរពច្បាប់»។ លោកស្រីក៏បានក្រើនរំឭកអំពីការការពារវិនិយោគិនថ្មីដោយសារ ទស្សនៈស្តីពីផ្សារហ៊ុន គឺថ្មីសម្រាប់កម្ពុជា។
លោកស្រីបន្ថែមថា៖ «វិនិយោគិនជាប្រចាំ នឹងយល់ពីផលប៉ះពាល់ខ្លាំងបំផុត បើទីផ្សារពួកគេ មិនដំណើរការទៅបានត្រឹមត្រូវ ឬមិនមានការអនុវត្តតាមបទប្បញ្ញត្តិត្រឹមត្រូវ។ រដ្ឋាភិបាល គួរគិតអំពីសុវត្ថិភាពរបស់ខ្លួន»។
លោក សម វិសុទ្ធ សាស្ត្រាចារ្យហិរញ្ញវត្ថុនៅសាកលវិទ្យាល័យបញ្ញាសាស្ត្រ បានចែករំលែកយោបល់ទាំងនោះ ដោយព្រមានថា ក្របខ័ណ្ឌបទប្បញ្ញត្តិ មិនត្រូវបានយកទៅអនុវត្តបានត្រឹម ត្រូវឡើយ។ លោកថ្លែងថា៖ «បើក្របខ័ណ្ឌទាំងនោះ មិនត្រូវបានយកទៅអនុវត្តឲ្យបានម៉ត់ចត់ទេ វានឹងបង្កគ្រោះថ្នាក់ដល់់វិនិយោគិនពិសេសវិនិយោគិនតូចៗ»។
លោកស្រី ងួន សុខា អគ្គនាយក និងជាអ្នកនាំពាក្យរបស់ធនាគារជាតិនៃកម្ពុជា សារភាពថា រដ្ឋាភិបាលនៅតែមានការងារមួយចំនួនដើម្បីពង្រឹងឧស្សាហកម្មមូល បត្រនៅកម្ពុជា។
លោកស្រីបន្តថា៖ «យើងមានការងារជាច្រើនត្រូវធ្វើ។ ខ្ញុំគិតថា ការត្រៀមខ្លួន មិនទាន់ត្រឹមត្រូវឡើយ នៅពេលដែលបរិស្ថានសេដ្ឋកិច្ច មានទំហំតូច និងមានអ្នកចូលរួមតិចតួច»។
លោកស្រីបន្តថា៖ «ខ្ញុំសង្ឃឹមថា ទីផ្សារភាគហ៊ុន នឹងមានដំណើរការដោយរលូន ដោយសារក្រុមហ៊ុនមូលបត្រ ដែលមានជំនាញវិជ្ជាជីវៈ បទពិសោធច្រើនឆ្នាំនៅបរទេស ដូច្នេះពួកគេ នឹងមានជំនាញ និងបទពិសោធច្រើនឆ្នាំ ដើម្បីអភិវឌ្ឍឧស្សាហកម្មថ្មី នៅប្រទេសរបស់យើង»។
ផ្សារហ៊ុនកម្ពុជា គឺវិនិយោគរួមគ្នារវាងរដ្ឋាភិបាលកម្ពុជា ដែលមានភាគហ៊ុន៥៥ភាគរយ និងផ្សារហ៊ុនកូរ៉េខាងត្បុង ដែលមានភាគហ៊ុនចំនួន ៤៥ភាគរយ។ ភាគីទាំងពីរ បាននិងកំពុងធ្វើការនៅលើគម្រោងនេះ ចាប់តាំងពីឆ្នាំ២០០៧មក។
មកទល់ពេលនេះ គណៈកម្មការមូលបត្រ បានផ្តល់អាជ្ញាប័ណ្ណដល់ក្រុមហ៊ុនឯកជនចំនួន១៥ សម្រាប់ក្រុមហ៊ុនធានាទិញមូលបត្រ ឈ្មួញមូលបត្រ ហ៊ុនសម្របសម្រួលការទិញលក់ភាគហ៊ុន និងអ្នកផ្តល់ប្រឹក្សាសម្រាប់ផ្សារហ៊ុនកម្ពុជា៕CS
Posted by ម៉ូត ផល្លា | 14 ខែកក្កដា 2011, 3:38 ល្ងាចhttp://khmer.phnompenhpost.com/index.php?option=com_content&view=article&id=61527:2011-07-11-23-04-58&catid=83:cambodia-securities-exchange&Itemid=259
Posted by ម៉ូត ផល្លា | 14 ខែកក្កដា 2011, 3:40 ល្ងាច