ភ្នំពេញៈ ១១ កក្កដាគឺជាការបើកទំព័រប្រវត្តិសាស្ត្រថ្មីសម្រាប់ដំណើរការ វិវត្តវិស័យហិរញ្ញវត្ថុរបស់កម្ពុជា។ កម្ពុជាជាប្រទេសក្រីក្រក្នុងតំបន់ដែលបានបើកផ្សារមូលបត្រ លើកដំបូងបន្ទាប់ពីប្រទេសឡាវ។ ប៉ុន្តែការចាប់ផ្តើមផ្សារមូលបត្រពេលនេះគ្រាន់តែជាការ ប្រាប់សាធារណជនអំពីការចាប់កំណើតផ្សារមូលបត្រកម្ពុជាប៉ុណ្ណោះ។
ស្របពេលដែលអ្នកសេដ្ឋកិច្ច មន្ត្រីរដ្ឋាភិបាលបានចាត់ទុកថាការបើកផ្សារមូលបត្រជាសញ្ញា វិជ្ជមានសម្រាប់ទីផ្សារហិរញ្ញវត្ថុ និងជាកក្តាលីករជំរុញកំណើនសេដ្ឋកិច្ច ពលរដ្ឋកម្ពុជាមិនសូវដឹងពីផ្សារមូលបត្រនេះទេ។
អាយុ២៤ ឆ្នាំ វាសនាជានិស្សិតឆ្នាំទីបួននៅសាកលវិទ្យាល័យមួយនៅរាជធានី ភ្នំពេញបាននិយាយថា មិនត្រឹមតែរូបគាត់ទេដែលមិនសូវដឹងពីបញ្ហានេះ ប៉ុន្តែប្រជាជនកម្ពុជាភាគច្រើនក៏ដូច្នេះដែរ។
វាសនាលើកឡើងថា៖ «ខ្ញុំគិតថា ប្រជាជនយើងភាគច្រើនមិនបានដឹងពីអ្វីទៅជាផ្សារហ៊ុននោះទេ តាមគំនិតរបស់ខ្ញុំ គេគួរតែផ្សព្វផ្សាយឲ្យបានទូលំទូលាយដើម្បីឲ្យពួកគាត់យល់ ពីផ្សារហ៊ុន និងពីផលប្រយោជន៍របស់វា»។
ផ្សារមូលបត្រជាគំនិតថ្មីមួយសម្រាប់ប្រជាជនកម្ពុជា។ កន្លងមកមានការផ្សព្វផ្សាយជាច្រើនអំពីផ្សារមូលបត្រ ជាពិសេសតាមរយៈសេចក្តីរាយការណ៍របស់ភ្នំពេញប៉ុស្តិ៍។
វាសនា និយាយថា រូបគេបានដឹងដែរតែមិនសូវជាទូលំទូលាយ ហើយភាគច្រើនបានដឹងតាមភាពយន្តបរទេស។ និស្សិតរូបនេះបន្តថា៖ «ភាគច្រើនខ្ញុំបានដឹងអំពីផ្សារហ៊ុនតាមភាពយន្តហុងកុង ដែលគេតែងតែនិយាយពីផ្សារហ៊ុន។ ខ្ញុំដឹងថាការលេងភាគហ៊ុនជាការទិញលក់ភាគហ៊ុន បើភាគហ៊ុនធ្លាក់ចុះគេនាំគ្នាទិញ បើឡើងគេលក់វាចេញ»។
ទោះយ៉ាងណា វាសនា បានសាទរនឹងការបើកផ្សារហ៊ុនថ្មីរបស់កម្ពុជានេះ ហើយថា នេះបង្ហាញពីការរីកចម្រើនក្នុងវិស័យសេដ្ឋកិច្ចរបស់ប្រទេស។
ដើម្បីលើកកម្ពស់ការយល់ដឹងពីផ្សារហ៊ុន និងជំនាញក្នុងកិច្ចការផ្សារហ៊ុន វិទ្យាស្ថានហិរញ្ញវត្ថុកម្ពុជា(FIC)ត្រូវបង្កើតឡើងក្រោម ការជួយឧបត្តម្ភបច្ចេកទេស និងចំណេះដឹងពីវិទ្យាស្ថានមូលបត្រហុងកុង។
លោក ស៊ន សុខណា នាយកវិទ្យាស្ថានឲ្យដឹងថា វិទ្យាស្ថាននេះបើកដំណើរការនៅចុង២០១០ ហើយថា ភាគច្រើនសិក្ខាកាមក្នុងវគ្គបណ្តុះបណ្តាលនេះមកពីស្ថាប័ន ក្រុមហ៊ុនឯកជន និងមន្ត្រីពីស្ថាប័នរដ្ឋាភិបាល។
លោកបន្តថា ពេលចាប់ផ្តើមពុំសូវមានអ្នកចាប់អារម្មណ៍ឡើយ៖«ដំបូងពុំមាន អ្នកចាប់អាម្មណ៍ នឹងវគ្គបណ្តុះបណ្តាលនេះទេ ប៉ុន្តែក្រោយមកមានមនុស្សជាច្រើនចាប់អារម្មណ៍នឹងផ្សារមូលបត្រ ពីព្រោះពួកគេចង់ដឹងអ្វីទៅជាផ្សារមូលបត្រ ពួកគេចង់សម្លឹងឱកាសការងារក្នុងវិស័យដ៏ថ្មីនេះ»។ លោក បន្ថែមថាវិទ្យាស្ថានក៏កំពុងបណ្តុះបណ្តាលសាស្ត្រាចារ្យផងដែរ ដើម្បីចែករំលែកចំណេះនេះបន្ត។
គុណ គួរចេតនា ជាអ្នកសារព័ត៌មានម្នាក់នៅកាសែតភ្នំពេញប៉ុស្តិ៍ ដែលបានចូលវគ្គបណ្តុះបណ្តាលពីផ្សារហ៊ុនបានឲ្យដឹងថា ដំបូងឡើយមានការលំបាក ព្រោះនេះជាមុខវិជ្ជាថ្មីសម្រាប់ពលរដ្ឋកម្ពុជាដូចជារូបគាត់។
ចេតនាបន្ថែមថា៖ «ពេលខ្ញុំចាប់ផ្តើមដំបូង ខ្ញុំមានអាម្មណ៍ថាប្លែកព្រោះជារឿងថ្មីសម្រាប់ខ្ញុំ។ ដំបូងខ្ញុំមិនយល់អី្វទៅជាផ្សារហ៊ុន និងអ្វីជាមូលបត្របំណុលទេ ប៉ុន្តែបន្ទាប់ពីបានចូលវគ្គនេះមកខ្ញុំយល់អស់ហើយ»។
ផ្សារមូលបត្រកម្ពុជាត្រូវបានពន្យារពេលពីរលើកហើយ មុននឹងឈានដល់ការសម្រេចចុងក្រោយនេះ។ ប៉ុន្តែការធ្វើពាណិជ្ជកម្មមិនទាន់ដំណើរការនៅឡើយទេ ដោយរង់ចាំរហូតចុងឆ្នាំ។
ថ្លែងក្នុងពិធីបើកសម្ពោធដាក់ឲ្យដំណើរការផ្សារមូលបត្រកម្ពុជា កាលពីថ្ងៃទី១១ កក្កដា លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការបើកផ្សារមូលបត្រពេលនេះជាប្រវត្តិសាស្ត្រថ្មីមួយក្នុង វិស័យហិរញ្ញវត្ថុកម្ពុជា និងសេដ្ឋកិច្ចជាតិទាំងមូល។ លោកបន្តថា៖ «នេះបង្ហាញឲ្យឃើញថា កម្ពុជាកំពុងឈានចូលដល់ដំណាក់កាលថ្មីមួយនៃការអភិវឌ្ឍវិស័យ ហរិញ្ញវត្ថុ ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ២០០៦-២០១៥»។
មកដល់ពេលនេះមានតែសហគ្រាសរដ្ឋចំនួនបីប៉ុណ្ណោះដែលអនុញ្ញតឲ្យចុះបញ្ចីនៅក្នុងផ្សារហ៊ុន។
អ្នកសេដ្ឋកិច្ចបាននិយាយថា ដំណើរឆ្ពោះទៅរកការបង្កើតផ្សារមូលបត្រជាសញ្ញាវិជ្ជមានសម្រាប់សេដ្ឋកចិ្ចកម្ពុជា។
លោក កង ច័ន្ទតារារ័ត្ន សាស្ត្រាចារ្យសេដ្ឋកិច្ចនៃសាកលវិទ្យាល័យពុទ្ធសាស្ត្រា និងជាប្រធាន វិទ្យាស្ថានកម្ពុជាដើម្បីសិក្សាអភិវឌ្ឍន៍បានឲ្យដឹងថា៖ «ការបង្កើតផ្សារហ៊ុនជាសញ្ញាវិជ្ជមាន ក្នុងការរួមចំណែកអភិវឌ្ឍសេដ្ឋកិច្ច ព្រោះតាមរយៈផ្សារហ៊ុន នឹងធ្វើឲ្យកម្ពុជាមានលទ្ធភាពប្រមែប្រមូលទុនមកដាក់ក្នុងសកម្ម ភាពសេដ្ឋកិច្ច ទាក់ទាញទុនបរទេសមកក្នុងប្រទេសនិងទប់ស្កាត់ការហូរចេញទុនពី កម្ពុជាទៅក្រៅផងដែរ»។
ទោះបីយ៉ាងណាក្តី លោក កង ច័ន្ទតារារ័ត្ន ថ្លែងថា ការលើកកម្ពស់ការយល់ដឹងជាសាធារណៈចំពោះផ្សារមូលបត្រក៏ជារឿង សំខាន់មួយដែរ។ លោកបន្ថែមថា៖ «យើងត្រូវធ្វើកំណែទម្រង់វិស័យសាធារណៈ និង ឯកជន។ ការយល់ដឹងរបស់សាធារណជនក៏នៅទាប។ យើងត្រូវការនីតិវិធីដ៏យូរអង្វែងទៀតដើម្បីលើកកម្ពស់ការយល់ ដឹងជាសាធារណៈ ដើម្បីឲ្យដំណើរការផ្សារហ៊ុនស្ថិតនៅក្រោមយន្តការលើកកម្ពស់ កំណើនសេដ្ឋកិច្ច» កញ្ញា សុភក្តី ជានិស្សិតម្នាក់ផ្សេងទៀតនិយាយថា គេមិនបានដឹងថា អ្វីទៅជាផ្សារហ៊ុននោះទេ។ សុភក្តីនិយាយថារូបគេក៏ចង់ដឹងពីអត្ថប្រយោជន៍នៃផ្សារហ៊ុនផង ដែរ៖ «ខ្ញុំគិតថាបើប្រទេសខ្មែរយើងបើកផ្សារហ៊ុន ប្រជាជនគួរតែបានយល់ពីវា ដូច្នេះពួកគេអាចដឹងពីគុណវិបត្តិ និងគុណប្រយោជន៍វា»៕
http://khmer.phnompenhpost.com/index.php?option=com_content&view=article&id=61528:2011-07-11-23-08-13&catid=83:cambodia-securities-exchange&Itemid=259
សាធារណជន យល់ដឹងតិចតួចអំពីផ្សារភាគហ៊ុន
ភ្នំពេញ : ខណៈពេលក្រុមមន្ត្រីរដ្ឋាភិបាល និងក្រុមវិនិយោគិន អបអរសាទរដល់ការបើកដាក់ឲ្យដំណើរការកាលពីថ្ងៃម្សិលមិញនូវ ទីផ្សារភាគហ៊ុនរបស់កម្ពុជានោះ ប្រតិកម្មនៅតាមដងផ្លូវបានបង្ហាញថា វាអាចចំណាយពេលវេលាខ្លះមុននឹងប្រជាពលរដ្ឋក្នុងស្រុក ត្រៀមខ្លួនរួចរាល់ដើម្បីចូលទិញ និងលក់នៅក្នុងទីផ្សារនេះ។
សុវណ្ណ រ័ត្ន ដែលប្រកបអាជីវកម្មតូចមួយនៅជិតអគារកាណាឌីយ៉ា ជាទីដែលក្រុមហ៊ុនផ្សារមូលបត្រកម្ពុជា (CSX) ស្ថិតនៅខាងក្នុងនោះ បានថ្លែងថា គាត់បានឮការចាកផ្សាយពីផ្សារភាគហ៊ុននៅតាមវិទ្យុនិងទូរទស្ស ន៍។
នាងបានសម្តែងនូវក្តីសង្ឃឹមថា ការបើកផ្សារភាគហ៊ុននេះ គឺជាសញ្ញាមួយបញ្ជាក់ថា ការអភិវឌ្ឍនៅក្នុងប្រទេសកម្ពុជា កំពុងតែខ្លាំងក្លាឡើង ហើយថា វានឹងមានឥទ្ធិពលវិជ្ជមានដល់សេដ្ឋកិច្ចជាតិ។
សុវណ្ណ រ័ត្ន បានប្រាប់ថា៖ «ប្រទេសជាច្រើននៅលើពិភពលោក សុទ្ធតែមានទីផ្សារភាគហ៊ុន ដូច្នេះ ប្រសិនបើកម្ពុជាអាចដើរតាមប្រទេសទាំងនោះ វាល្អណាស់។ វាក៏ជួយផងដែរដល់ការអភិវឌ្ឍអាជីវកម្មនៅកម្ពុជា»។ លោកបានឲ្យដឹងថា លោកចាប់អារម្មណ៍នៅក្នុងការវិនិយោគ ប៉ុន្តែ ខ្វះមូលនិធិដើម្បីធ្វើដូច្នេះ។
មនុស្សមួយចំនួននិយាយថា ពួកគេដឹងពីទីផ្សារភាគហ៊ុន ប៉ុន្តែ មិនយល់ថា តើវាមានដំណើរការ ឬអាចប៉ះពាល់ពួកគេដោយរបៀបណានោះឡើយ។
ទីវ សុជាវ ម្ចាស់ហាងមួយរូបទៀតនៅជិតអគារកាណាឌីយ៉ា ថ្លែងថា៖ «ខ្ញុំដឹងពីផ្សារភាគហ៊ុននេះ ប៉ុន្តែ ខ្ញុំមិនដឹងធ្វើអ្វីឡើយ ហើយខ្ញុំមិនដឹងថា ហេតុអ្វីវាមានសារៈសំខាន់នោះឡើយ»។
ម៉ុក ផល្លា អ្នកបើកបរម៉ូតូកង់បីនៅជិតមាត់ទន្លេ បាននិយាយថា គាត់ក៏មិនយល់ដែរអំពីទីផ្សារភាគហ៊ុន បើទោះបីជាគាត់បានតាមដានការចាប់ផ្តើមដំណើរការរបស់វាក្តី។ គាត់និយាយថា៖ «ខ្ញុំបានដឹងអំពីរឿងនេះជាយូរមកហើយ តាមរយៈអានកាសែត ប៉ុន្តែ ខ្ញុំមិនយល់ថា វាជាអ្វីនោះឡើយ»។
មនុស្សដទៃទៀតនិយាយថា ផ្សារភាគហ៊ុន នឹងគ្រាន់តែច្រកមួយឆ្ពោះទៅរកទ្រព្យសម្បត្តិ។
រដ្ឋា ដែលមានតូបលក់ដូរមួយ និងលក់ខោអាវនៅផ្សារធំថ្មី បាននិយាយថា៖ «វាមានសារៈសំខាន់សម្រាប់មនុស្ស ដែលមានប្រាក់ច្រើន ប៉ុន្តែ ខ្ញុំធ្វើអាជីវកម្មតូចតាចបែបនេះហើយខ្ញុំគ្មានប្រាក់ឯណាទៅ វិនិយោគទេ។ ដូច្នេះវាមិនសំខាន់ចំពោះខ្ញុំទេ»។
ឡាវ សុភ័ណ្ឌ សន្តិសុខម្នាក់នៅ Blue Pumpkin នៅជិតមាត់ទន្លេ បានថ្លែងដូចគ្នានេះដែរ។ កាត់ថា៖ «វាល្អសម្រាប់អ្នកមាន ប៉ុន្តែមិនល្អសម្រាប់អ្នកក្រទេ ព្រោះអ្នកក្រអត់លុយទៅទិញវាទេ»។
ទោះបីជា ផ្សារមូលបត្របានបើកជាផ្លូវការកាលពីថ្ងៃម្សិលមិញក៏ដោយ ការទិញលក់មូលបត្រ មិនត្រូវបានគេរំពឹងថានឹងចាប់ផ្តើមនោះឡើយរហូតដល់ដំណាច់ឆ្នាំ នេះ៕
Posted by ម៉ូត ផល្លា | 14 ខែកក្កដា 2011, 3:52 ល្ងាចhttp://khmer.phnompenhpost.com/index.php?option=com_content&view=article&id=61530:2011-07-11-23-17-13&catid=83:cambodia-securities-exchange&Itemid=259
Posted by ម៉ូត ផល្លា | 14 ខែកក្កដា 2011, 3:52 ល្ងាចhttp://khmer.phnompenhpost.com/index.php?option=com_content&view=article&id=61531:2011-07-11-23-22-30&catid=83:cambodia-securities-exchange&Itemid=259
ផ្សារមូលបត្រកម្ពុជាកំពុងសម្លឹងមើលបទពិសោធពីអ្នកជិតខាងរបស់ខ្លួន
ភ្នំពេញ: ជាមួយនឹងការមកដល់តាមការរំពឹងទុកនៃផ្សារមូលបត្រកម្ពុជាជា លើកទីមួយកាលពីម្សិលមិញ ក្រុមអ្នកវិនិយោគក្នុងប្រទេសកម្ពុជាកំពុងសម្លឹងមើលទៅប្រទេសជិត ខាងដើម្បីស្វែងរកគំរូស័ក្តិសមបំផុតដើម្បីយកគំរូតាម។
ផ្សារមូលបត្រក្នុងតំបន់ទាំងក្នុងប្រទេសឡាវ និងទាំងក្នុងប្រទសវៀតណាម ត្រូវបានលើកឡើងជា លក្ខណៈប្រៀបធៀបដោយអ្នកវិនិយោគក្នុងតំបន់។
ផ្សារមូលបត្រទីក្រុង ហូ ជីមិញ របស់ប្រទេសវៀតណាម ត្រូវបានបង្កើតឡើងកាលពីឆ្នាំ២០០០ ហើយកាលពីដំបូងមានក្រុមហ៊ុនចេញលក់មូលបត្រចំនួនតែពីរប៉ុណ្ណោះ។ រហូតដល់ខែកក្កដា ឆ្នាំមុន ក្រុមហ៊ុនសរុបចំនួន២៤៧ ត្រូវបានចុះបញ្ជី។
នាយកក្រុមហ៊ុនមូលបត្រ VinaSecurities Adrian Cundy បានថ្លែងកាលពីម្សិលមិញថា៖ «ជោគជ័យនៃផ្សារមូលបត្រនឹងផ្អែកទៅលើក្រុមហ៊ុនដែលអាចវិនិយោគ បាននិងតម្លៃភាគហ៊ុន មិនមែនផ្អែកលើចំនួនប្រជាជនឬទំហំប្រទេសនោះទេ។ ដូច្នេះ តាមពិតដែលថា វៀតណាមជាប្រទេសធំជាង ដែលមានប្រជាជនរហូតដល់ជិត៩០លាននាក់ មិនមែនជាបញ្ហាចំពោះឱកាសរបស់ប្រទេសកម្ពុជាក្នុងការចាប់ ផ្តើមផ្សារមូលបត្រជោគជ័យមួយនោះទេ»។ លោកបានបន្តថា៖ «នោះគឺថាក្បាលម៉ាស៊ីននៃការលូតលាស់គឺស្ថិតនៅក្នុងសេដ្ឋកិច្ច សេរី»។
លោកបានបន្ថែមថា វៀតណាមមានក្រុមហ៊ុនហិរញ្ញវត្ថុ ក្រុមហ៊ុនអចលនទ្រព្យ សហគ្រាសខ្នាតតូចនិងខ្នាតមធ្យមជាច្រើន ហើយថ្មីៗនេះ អ្នកប្រើប្រាស់ជាអ្នកដើរតួ។ នេះគឺដោយសារតែភាពរីកចម្រើនចេញពីក្រុមហ៊ុនអចលនទ្រព្យដែល បង្កើតហេដ្ឋារចនាសម្ព័ន្ធជាមួយប្រាក់កម្ចី។ លោកបន្តថា៖ «វាពិបាកនិយាយថា តើរឿងនឹងទៅជាយ៉ាងដូចម្តេចក្នុងប្រទេសកម្ពុជា … កម្ពុជាមានឱកាសជាច្រើន»។
Naoto Sumiyoshi ប្រធានអ្នកស្រាវជ្រាវនៅក្រុមហ៊ុនវិនិយោគជប៉ុន WorldStock ជឿថា ទោះបីជាវៀតណាមមានភាពពេញវ័យដោយជោគជ័យជាមួយផ្សារមូលបត្រ មួយដែលមានតម្លៃខ្ពស់ក៏ដោយ ដំណើរដំបូងគឺមិនមើលទៅមិនមានលក្ខណៈវិជ្ជមានដូចនេះទេ។
លោកបន្តថា៖ «យើងអាចរំពឹងថានឹងមានតម្លៃខ្ពស់ដូចគ្នានៅទីនេះ»។
ការវិនិយោគរបស់ក្រុមហ៊ុន WorldStock ក្នុងប្រទេសវៀតណាមរួមមានវិស័យ ធនាគារ ម្ហូបអាហារ កសិកម្ម ថាមពល និងអចលនទ្រព្យ។ លោកបានបន្ថែមថា ស្ថានភាពក្នុងប្រទេសឡាវ គឺមិនល្អ ហើយរំពឹងថា ក្រុមហ៊ុនច្រើនទៀតនឹងចាប់ផ្តើមចុះបញ្ជីនៅលើផ្សារមូលបត្រ។
ផ្សារមូលបត្រក្នុងប្រទេសឡាវបានចាប់ផ្តើមប្រតិបត្តិការនៅខែ មករា ឆ្នាំ២០១១ហើយ ដូចផ្សារមូលបត្រកម្ពុជាដែរ គឺបានបើកដោយមិនទាន់មានក្រុមហ៊ុនចុះបញ្ជី។ ប៉ុន្តែរហូតមកដល់នេះមានក្រុមហ៊ុនពីរបានចុះបញ្ជីនិងប្រតិ បត្តិការ គឺ Electricite du Laos និង Banque Pour Le Commerce ។
Martin Desautels ទីប្រឹក្សាផ្នែកច្បាប់និងពន្ធនៅ DFDL Mekong ដែលមានមូលដ្ឋាននៅរាជធានីភ្នំពេញ បានថ្លែងនៅក្នុងពិធីចាប់ផ្តើមកាលពីម្សិលមិញថា ឡាវគឺជាគំរូល្អប្រសើរមួយ ដែលតំណាងនូវអ្វីដែលនឹងកើតឡើងនៅទីនេះ។ លោកថ្លែងថា៖ «វាបានដំណើរការទៅយ៉ាងល្អនៅក្នុងប្រទេសឡាវ ហើយព្យាករថា នឹងមានផ្លូវមួយស្រដៀងគ្នានៅទីនេះ»។ លោកបានថ្លែងថា វាល្អដែលចាប់ផ្តើមនៅពេលឥឡូវនេះ ហើយធ្វើឲ្យប្រជាជនចាប់អារម្មណ៍។ «វាជាសញ្ញាចាប់ផ្តើមល្អមួយ…វាបើកចំហសម្រាប់អាជីវកម្ម ដូច្នេះប្រជាជននឹងចាប់ផ្តើមរៀបចំខ្លួន»។
Desautels បានបន្ថែមថា មានសក្តានុពលរីកចម្រើនច្រើនក្នុងប្រទេសកម្ពុជា ប៉ុន្តែនៅប្រទេសឡាវមានក្រុមហ៊ុនធំៗជាង។ ដូច្នេះខណៈដែលកម្ពុជាអាចនឹងមានក្រុមហ៊ុនច្រើនជាង ទំហំទីផ្សារនៅកម្ពុជាទំនងជាធំជាងនៅប្រទេសឡាវ»។ លោក Han Kyung Tae នាយកគ្រប់គ្រងនៅក្រុមហ៊ុនមូលបត្រ Tong Yang Securities កម្ពុជា ក៏បានសង្កត់ធ្ងន់ផងដែរទៅសក្តានុពលរីកចម្រើននៃសេដ្ឋកិច្ច កម្ពុជា។
លោកប្រាប់ភ្នំពេញប៉ុស្តិ៍កាលពីខែឧសភា ឆ្នាំនេះថា៖ «កម្ពុជាស្ថិតនៅក្នុងកម្រិតក្មេងខ្ចីនៃការអភិវឌ្ឍន៍របស់ ខ្លួន។ ទីផ្សារគឺរីកចម្រើនយ៉ាងលឿន»។ ការផ្តល់ជាលើកទីមួយនឹងការធ្វើឡើងនៅចុងឆ្នាំនេះ ហើយដែលភាគច្រើនបំផុតទំនងជាផ្តល់ទៅឲ្យក្រុមហ៊ុនក្នុងវិស័យ ចម្បងៗដូចជា វិស័យធនាគារ ទូរគមនាគមន៍ កសិកម្ម សេវា និងកាត់ដេរ។
លោកបានបន្តថា៖ «ពួកគេនឹងបន្តរក្សាទិសដៅទាក់ទាញសម្រាប់ក្រុមអ្នកវិនិយោគបរទេស»។
លោក Han រំពឹងថា មានក្រុមហ៊ុនពី៥ទៅ១០ក្រុមហ៊ុននឹងទទួលបានការផ្តល់សិទ្ធិ ទទួលស្គាល់ជាសាធារណៈក្នុងរយៈពេលពីរបីឆ្នាំដំបូងបន្ទាប់ពីការ ចាប់ផ្តើមផ្សារមូលបត្រនេះ ដោយមានក្រុមហ៊ុនកំពូលៗ ក្នុងវិស័យនីមួយៗកំពុងត្រៀមខ្លួនចុះបញ្ជីក្នុងផ្សារមូល បត្រកម្ពុជាដំបូងនេះ៕ PS
Posted by ម៉ូត ផល្លា | 14 ខែកក្កដា 2011, 3:54 ល្ងាច