ប្លកផល្លា

ការដំឡើងថ្លៃទំនិញ និងសេវាកម្មនៅពេលបុណ្យទានធំៗ នៅតែចោទជាបញ្ហា

ម៉ូត ផល្លា — Sun, 02 Oct 2011 04:45:45 +0000

ការដំឡើងថ្លៃទំនិញនិងសេវាកម្មនៅពេលបុណ្យទានធំៗនៅតែចោទជាបញ្ហា។ តើមូលហេតុអ្វីបានជាអ្នកជំនួញដំឡើងថ្លៃនៅពេលនេះ? តើគេអាចប្រើប្រាស់វិធានការដើម្បីបញ្ចុះតម្លៃបានឬទេ?

ការដំឡើងថ្លៃទំនិញនិងសេវាកម្មនៅពេលមានបុណ្យទានធំម្តងៗនៅតែជាប្រធានបទក្តៅគគុកដដែលរវាងអ្នកប្រើប្រាស់និងអ្នកជំនួញ។

អ្នកលក់ដូរនៅក្នុងប្រទេសកម្ពុជាតែងតែឆ្លៀតឧិកាសបុណ្យប្រពៃណីជាតិនិងបុណ្យអន្តរជាតិម្តងៗដើម្បីដំឡើងថ្លៃទំនិញនិងសេវាកម្មកប់ពពក។ នៅក្នុងពិធីបុណ្យភ្ជុំបិណ្ឌឆ្នាំនេះ សេវាដឹកជញ្ជូនបានសម្រេចចិត្តដំឡើងថ្លៃលើសពី៥០ភាគរយ។ ការធ្វើដំណើរពីភ្នំពេញទៅក្រុងប៉ៃលិននៅថ្ងៃធម្មតាមានតម្លៃតែ៥ដុល្លារក្នុងមួយនាក់ប៉ុន្តែសម្រាប់ថ្ងៃបុណ្យភ្ជុំបិណ្ឌ តម្លៃបានកើនឡើងដល់៨ដុល្លារក្នុងម្នាក់។ សេវាដឹកជញ្ជូនតាមរថយន្តក្រុងពីភ្នំពេញទៅកាន់ខេត្តសៀមរាបបានឡើងថ្លៃក្នុងកម្រិតដូចគ្នាដែរ។

ក្រៅពីសេវាកម្មធ្វើដំណើរ សេវាកម្មស្នាក់នៅនិងសេវាកម្មម្ហូបអាហារនៅតាមបណ្តាទីរមណីយដ្ឋានមួយចំនួន តម្លៃក៏ត្រូវបានគេដំឡើងដែរ។ ការដំឡើងថ្លៃទំនិញនិងសេវាកម្មនៅពេលបុណ្យធំៗបង្កអោយមានការខឹងសម្បាពីសំណាក់អតិថិជនគ្រប់រូប។

សាលារាជធានីភ្នំពេញបានប្រកាសអំពាវនាវដល់ម្ចាស់សេវាកម្មដឹកជញ្ជូនទាំងឡាយកុំអោយដំឡើងថ្លៃសេវាកម្មនៅពេលបុណ្យភ្ជុំបិណ្ឌនេះ។ សាលាក្រុងភ្នំពេញថែមទាំងនិយាយថាការមិនដំឡើងថ្លៃសេវាជញ្ជូនគឺជាការធ្វើបុណ្យដាក់ទាននៅពេលបុណ្យប្រពៃណីភ្ជុំបិណ្ឌ។

ការដំឡើងថ្លៃសេវាកម្មដឹកជញ្ជូនជ្រុលហួសហេតុពេកវានឹងបង្កគ្រោះថ្នាក់ចរាចរណ៍ពីព្រោះអ្នកក្រីក្រត្រូវតែបង្ខំចិត្តជិះប្រជ្រៀតគ្នាទាំងលើដំបូលនិងកន្ទុយឡាន។

សេចក្តីអំពាវនាវបានធ្វើឡើងដូចគ្នាដែរក្នុងចំណោមអ្នកជំនាញវិស័យទេសចរណ៍។ ពួកគេបានអំពាវនាវដល់អ្នកលក់ដូរនៅក្នុងតំបន់កំសាន្តនានាកុំអោយដំឡើងថ្លៃម្ហូបអាហារជ្រុលពេកនៅក្នុងពិធីបុណ្យភ្ជុំបិណ្ឌ។ ការដំឡើងថ្លៃជ្រុលពេកគឺជាការបណ្តេញភ្ញៀវអោយចាកឆ្ងាយពីតំបន់កំសាន្តរបស់លោកអ្នក។

ការអំពាវនាវរបស់អាជ្ញាធរនិងអ្នកជំនាញបានធ្វើឡើងជារឿយៗមែន។ ប៉ុន្តែតម្លៃសេវាកម្មនិងទំនិញនៅតែត្រូវបានគេដំឡើងដដែល។

តើមូលហេតុអ្វីបានជាអ្នកជំនួញដំឡើងថ្លៃនៅពេលបុណ្យទានធំៗ? តើគេអាចប្រើប្រាស់វិធានការនានាដើម្បីបញ្ចុះតម្លៃបានឬទេ?

អ្នកជំនួញខាងសេវាកម្មដឹកជញ្ជូនបានពន្យល់ថា ការដំឡើងថ្លៃនេះគឺបណ្តាលមកពីមូលហេតុមួយចំនួនក្នុងនោះមាន៖ទីមួយ៖គឺដោយសារនៅពេលបុណ្យភ្ជុំបិណ្ឌរថយន្តដឹកជញ្ជូនប្រជាពលរដ្ឋ ដឹកបានតែពីទីក្រុងភ្នំពេញ ទៅកាន់ខេត្តនានារីឯពេលត្រលប់មកកាន់ទីក្រុងវិញ រថយន្តដឹកមនុស្សបានចំនួនតិចតួចប៉ុណ្ណោះ។ អ៊ីចឹងហើយ ទើបម្ចាស់រថយន្តសម្រេចចិត្តដំឡើងថ្លៃសេវាស្ទើរជាងពាក់កណ្តាលនោះ។ ម្យ៉ាងវិញទៀត កម្មករសេវាកម្មដឹកជញ្ជូនមួយចំនួនសុំដំឡើងប្រាក់ឈ្នួលការងាររបស់ខ្លួននៅក្នុងថ្ងៃបុណ្យទាន ដូច្នេះ ថៅកែក្រុមហ៊ុនរថយន្តត្រូវតែដំឡើងថ្លៃបន្ថែម។ ហើយតម្លៃបន្ថែមនេះវាធ្លាក់មកដល់អ្នកប្រើប្រាស់។

ចំពោះថ្លៃម្ហូបអាហារនិងសេវាកម្មវិញ អ្នកជំនួញមួយចំនួនបានផ្តល់ហេតុផលថា ក្នុងថ្ងៃធម្មតា ពួកគេរកប្រាក់ចំណូលបានសម្រាប់តែចំណាយទៅវិញប៉ុណ្ណោះ។ អ៊ីចឹងហើយបានជាថ្ងៃបុណ្យទានធំៗ ពួកគេត្រូវតែដំឡើងថ្លៃបន្តិច។ ប្រសិនបើពួកគេគ្មានថ្ងៃត្រូវប៉ាន់ទេនោះ ប្រហែលជាអាជីវកម្មរបស់ពួកគេក្ស័យធនអស់ទៅហើយ។ ថ្ងៃបុណ្យទានគឺជាពេលវេលារកប្រាក់ចំណេញដើម្បីទប់ថ្ងៃលក់មិនដាច់នាខែកន្លងមក។

ហេតុផលខាងលើនេះគឺមានមូលដ្ឋានច្បាស់លាស់។ ប៉ុន្តែស្ថានភាពនៅកម្ពុជាខុសគ្នាពីស្ថានភាពនៃប្រទេសអភិវឌ្ឍន៍មួយចំនួន។ នៅក្នុងប្រទេសជឿនលឿនមួយចំនួន របៀបធ្វើទីផ្សាររបស់គេគឺគេបញ្ចុះតម្លៃនៅពេលមានពិធីបុណ្យទានធំៗពីព្រោះពេលនេះគឺជាឧិកាសផ្សព្វផ្សាយផលិតផលរបស់គេអោយកាន់តែលក់ដាច់ថែមទៀត។ លក់ដាច់ច្រើនចំណេញតិច មានន័យស្មើនឹងចំណេញច្រើន។

ងាកមកឆ្លើយនឹងសំណួរដែលសួរថា តើអាជ្ញាធរអាចមានវិធានការដាក់គំនាបទៅលើឈ្មួញដែលដំឡើងថ្លៃទំនិញនិងសេវាកម្មបានដែរឬទេ?

ចម្លើយគឺថា មិនអាចធ្វើបានទេពីព្រោះនេះជារបបទីផ្សារសេរី ដូច្នេះ តម្លៃត្រូវតែប្រែប្រួលទៅតាមតម្រូវការនិងការផ្គត់ផ្គង់៕

ស្តាប់សម្លេង

ប្រភព៖

ក្រសួងអប់រំមិនបញ្ជូនសិស្សពូកែទៅប្រឡងនៅបរទេស

ម៉ូត ផល្លា — Thu, 14 Jul 2011 07:01:47 +0000

បន្ទាប់ពីមិនបានបញ្ជូនសិស្សពូកែផ្នែកគណិតវិទ្យាទៅចូលរួម ប្រកួតនៅប្រទេសហូឡង់ ក្រសួងអប់រំត្រូវបានរកឃើញថា មិនបានបញ្ជូនសិស្សពូកែទៅប្រកួតនៅបរទេសចំនួន១១នាក់ហើយដែល ក្នុងនោះរួមមានសិស្សពូកែផ្នែកគណិតវិទ្យានិងរូបវិទ្យា។ នេះបើតាមការបញ្ជាក់របស់គ្រូបង្រៀនមួយរូបដែលស្នើសុំមិនបញ្ចេញ ឈ្មោះ។ លោកគ្រូម្នាក់នេះបញ្ជាក់ប្រាប់វីអូអេខ្មែរថា៖

«កាលពីខែមុនមានការប្រឡងរូបវិទ្យា ដែលត្រូវទៅប្រឡងនៅប្រទេសអ៊ីស្រាអែល។ គេអត់បានបញ្ជូនទៅ»។

សិស្សពូកែផ្នែករូបវិទ្យាចំនួន៥នាក់បើតាមគម្រោងនឹងត្រូវ បញ្ជូនទៅប្រឡងនៅអ៊ីស្រាអែលកាលពីដើមខែមិថុនា កន្លទៅនេះក៏ប៉ុន្តែបានខកខានទៅវិញ។ ក្រសូងអប់រំបានជូនដំណឹងប្រទេសហូឡង់កាលពីពេលថ្មីៗនេះថា ខ្លួនមិនបានបញ្ជូនសិស្សទៅចូលរួមប្រឡងគណិតវិទ្យាទេ តែក៏មិនបានបញ្ជាក់ពីហេតុផលច្បាស់លាស់ដែរ។

ហូឡង់គ្រោងនឹងរៀបចំការប្រឡងប្រជែងសិស្សពូកែគណិតវិទ្យាជា លក្ខណៈអន្តរជាតិនៅថ្ងៃទី២៨ ខែកក្កដា ឆ្នាំ២០១១ នេះដោយមានសិស្សចំនួន១០០ប្រទេសចូលរួម ដែលក្នុងនោះមានកម្ពុជាផងដែរ។ ការប្រកាសលុបចោលនេះបានធ្វើឲ្យសិស្សដែលបានរៀនត្រៀមខកចិត្ត និងបានរិះគន់ក្រសួងអប់រំថា មិនបានយកចិត្តទុកដាក់ក្នុងការផ្តល់ឱកាសឲ្យពួកគេបង្ហាញ សមត្ថភាពនៅលើឆាកអន្តរជាតិ។

រហូតមកដល់ថ្ងៃពុធនេះ មិនមានការបញ្ជាក់ណាមួយពីក្រសួងអប់រំអំពីមូលហេតុនៃការមិន បញ្ជូនសិស្សពូកែទៅប្រឡងនៅបរទេសនៅឡើយទេ។ លោក អ៊ឹម សិទ្ឋី រដ្ឋមន្ត្រីក្រសួងអប់រំមិនអត្ថាធិប្បាយទេ ដោយលោកបានបញ្ជាក់ថា លោកកំពុងជាប់រវល់ប្រជុំ។

«ជាប់ប្រជុំ។ យើងធ្វើការងារ។ មកសម្ភាសន៍ស្អី»។

ខណៈដែលក្រសួងអប់រំមិនបានបញ្ជូនសិស្សទៅប្រឡងសិស្សពូកែនៅ បរទេសនោះ មន្ត្រីរបស់ក្រសួងមួយចំនួនត្រូវបានចោទប្រកាន់ថា មិនបានផ្តល់ប្រាក់ឧបត្ថម្ភដល់សិស្សផ្នែកគណិតវិទ្យាចំនួនប្រាំមួយ រូបដែលបានមករៀនបំប៉នបន្ថែមនៅក្នុងរដ្ឋធានីភ្នំពេញចាប់ពីដើមខែ មករារហូតដល់ចុងខែមិថុនា។

លោកគ្រូបង្រៀនមួយរូបដែលស្នើមិនបញ្ចេញឈ្មោះបានបញ្ជាប់ថា សម្រាប់សិស្សដែលត្រូវមករៀនបំប៉នបន្ថែមនឹងត្រូវបានប្រាក់ឧបត្ថម ចំនួន២០ដុល្លារក្នុងមួយថ្ងៃសម្រាប់ម្នាក់ៗ។ ក៏ប៉ុន្តែមន្រ្តីរបស់ក្រសួងអប់រំបានផ្តល់ប្រាក់សម្រាប់តែថ្លៃបាយ បីពេលតែប៉ណ្ណោះ។ លោកគ្រូបានបន្ថែមថា បើគិតចំនួនសិស្សប្រាំមួយនាក់ក្នុងរយៈពេលប្រាំមួយខែ សិស្សទាំងនោះត្រូវបាត់បង់ប្រាក់ចំនួនជាង២០.០០០ដុល្លារអាមេរិក។ លោកគ្រូបានប្រាប់វីអូអេថា៖

«នៅក្នុងស្រុក នៅពេលដែលគេឲ្យសិស្សមកបំប៉ននៅភ្នំពេញ ខ្ញុំលួចសួរគេទើបដឹងថា គេបានចុះហត្ថលេខាពីរតនាគារជាតិម្នាក់បាន២០ដុល្លារជារៀងរាល់ ថ្ងៃ។ ប៉ុន្តែអ្វីដែលយើងទទួលបានសិស្សម្នាក់ទទួលបានមួយថ្ងៃបាយបីពេល ហើយការធ្វើដំណើរទៅបំប៉ននៅសាកលវិទ្យាល័យភូមិន្ទភ្នំពេញហ្នឹង គេចូលលុយគ្នាជិះទុកៗ»។

លោកគ្រូដែលសុំមិនបញ្ចេញឈ្មោះ ដោយហេតុផលសន្តិសុខនោះបានបញ្ជាក់ថា មិនដឹងប្រាក់ឧបត្ថម្ភទាំងអស់នោះ ក្រសួងអប់រំមិនផ្តល់ឲ្យ ឬក៏ខាងរតនាគារមិនទាន់បញ្ជូនឲ្យ។ ប៉ុន្តែលោក កែ ប៊ុនឡេង ប្រធានរតនាគាក្រុងភ្នំពេញបានបញ្ជាក់ថា លោកបានចុះហត្ថលេខាបញ្ជូនចេញរួចរាល់ហើយរាល់ប្រាក់ឧបត្ថម្ភផ្សេងៗ របស់ក្រសួងអប់រំ។ លោកបញ្ជាក់ថា៖

«បញ្ហារឿងលុយ ពេលមកដល់ ខ្ញុំជូនហើយ។ ខ្ញុំមកនៅនេះ១១ឆ្នាំហើយ។ ខ្ញុំមិនដឹងគៀងគរយកលុយហ្នឹងទៅទុកធ្វើអ្វី។ អត់ទេ។ រឿងប្រាក់ខែ រឿងប្រាក់ម៉ោង រឿងប្រាក់ឧបត្ថម្ភទៅរៀននេះគេហៅថាប្រាក់អាហារូបករណ៍របស់និស្សិត។ អញ្ចឹងទេអត់ទេ។ អត់មានលុយអញ្ចឹង អាចថាទើនៅនឹងក្រសួងក៏មិនដឹង»។

លោកប៊ុនឡេងបានបញ្ជាក់ទៀតថា លោកមិនដែលធ្វើឲ្យរាំងស្ទះដល់ប្រាក់ដែលត្រូវបញ្ជូនចេញនោះទេ៕

ផ្សារមូលបត្រកម្ពុជាចាប់កំណើត ប៉ុន្តែការយល់ដឹងរបស់សាធារណជនមានកម្រិតទាបនៅឡើយ

ម៉ូត ផល្លា — Thu, 14 Jul 2011 06:49:05 +0000

ភ្នំពេញៈ ១១ កក្កដាគឺជាការបើកទំព័រប្រវត្តិសាស្ត្រថ្មីសម្រាប់ដំណើរការ វិវត្តវិស័យហិរញ្ញវត្ថុរបស់កម្ពុជា។ កម្ពុជាជាប្រទេសក្រីក្រក្នុងតំបន់ដែលបានបើកផ្សារមូលបត្រ លើកដំបូងបន្ទាប់ពីប្រទេសឡាវ។ ប៉ុន្តែការចាប់ផ្តើមផ្សារមូលបត្រពេលនេះគ្រាន់តែជាការ ប្រាប់សាធារណជនអំពីការចាប់កំណើតផ្សារមូលបត្រកម្ពុជាប៉ុណ្ណោះ។

ស្របពេលដែលអ្នកសេដ្ឋកិច្ច មន្ត្រីរដ្ឋាភិបាលបានចាត់ទុកថាការបើកផ្សារមូលបត្រជាសញ្ញា វិជ្ជមានសម្រាប់ទីផ្សារហិរញ្ញវត្ថុ និងជាកក្តាលីករជំរុញកំណើនសេដ្ឋកិច្ច ពលរដ្ឋកម្ពុជាមិនសូវដឹងពីផ្សារមូលបត្រនេះទេ។

អាយុ២៤ ឆ្នាំ វាសនាជានិស្សិតឆ្នាំទីបួននៅសាកលវិទ្យាល័យមួយនៅរាជធានី ភ្នំពេញបាននិយាយថា មិនត្រឹមតែរូបគាត់ទេដែលមិនសូវដឹងពីបញ្ហានេះ ប៉ុន្តែប្រជាជនកម្ពុជាភាគច្រើនក៏ដូច្នេះដែរ។

វាសនាលើកឡើងថា៖ «ខ្ញុំគិតថា ប្រជាជនយើងភាគច្រើនមិនបានដឹងពីអ្វីទៅជាផ្សារហ៊ុននោះទេ តាមគំនិតរបស់ខ្ញុំ គេគួរតែផ្សព្វផ្សាយឲ្យបានទូលំទូលាយដើម្បីឲ្យពួកគាត់យល់ ពីផ្សារហ៊ុន និងពីផលប្រយោជន៍របស់វា»។

ផ្សារមូលបត្រជាគំនិតថ្មីមួយសម្រាប់ប្រជាជនកម្ពុជា។ កន្លងមកមានការផ្សព្វផ្សាយជាច្រើនអំពីផ្សារមូលបត្រ ជាពិសេសតាមរយៈសេចក្តីរាយការណ៍របស់ភ្នំពេញប៉ុស្តិ៍។

វាសនា និយាយថា រូបគេបានដឹងដែរតែមិនសូវជាទូលំទូលាយ ហើយភាគច្រើនបានដឹងតាមភាពយន្តបរទេស។ និស្សិតរូបនេះបន្តថា៖ «ភាគច្រើនខ្ញុំបានដឹងអំពីផ្សារហ៊ុនតាមភាពយន្តហុងកុង ដែលគេតែងតែនិយាយពីផ្សារហ៊ុន។ ខ្ញុំដឹងថាការលេងភាគហ៊ុនជាការទិញលក់ភាគហ៊ុន បើភាគហ៊ុនធ្លាក់ចុះគេនាំគ្នាទិញ បើឡើងគេលក់វាចេញ»។

ទោះយ៉ាងណា វាសនា បានសាទរនឹងការបើកផ្សារហ៊ុនថ្មីរបស់កម្ពុជានេះ ហើយថា នេះបង្ហាញពីការរីកចម្រើនក្នុងវិស័យសេដ្ឋកិច្ចរបស់ប្រទេស។

ដើម្បីលើកកម្ពស់ការយល់ដឹងពីផ្សារហ៊ុន និងជំនាញក្នុងកិច្ចការផ្សារហ៊ុន វិទ្យាស្ថានហិរញ្ញវត្ថុកម្ពុជា(FIC)ត្រូវបង្កើតឡើងក្រោម ការជួយឧបត្តម្ភបច្ចេកទេស និងចំណេះដឹងពីវិទ្យាស្ថានមូលបត្រហុងកុង។

លោក ស៊ន សុខណា នាយកវិទ្យាស្ថានឲ្យដឹងថា វិទ្យាស្ថាននេះបើកដំណើរការនៅចុង២០១០ ហើយថា ភាគច្រើនសិក្ខាកាមក្នុងវគ្គបណ្តុះបណ្តាលនេះមកពីស្ថាប័ន ក្រុមហ៊ុនឯកជន និងមន្ត្រីពីស្ថាប័នរដ្ឋាភិបាល។

លោកបន្តថា ពេលចាប់ផ្តើមពុំសូវមានអ្នកចាប់អារម្មណ៍ឡើយ៖«ដំបូងពុំមាន អ្នកចាប់អាម្មណ៍ នឹងវគ្គបណ្តុះបណ្តាលនេះទេ ប៉ុន្តែក្រោយមកមានមនុស្សជាច្រើនចាប់អារម្មណ៍នឹងផ្សារមូលបត្រ ពីព្រោះពួកគេចង់ដឹងអ្វីទៅជាផ្សារមូលបត្រ ពួកគេចង់សម្លឹងឱកាសការងារក្នុងវិស័យដ៏ថ្មីនេះ»។ លោក បន្ថែមថាវិទ្យាស្ថានក៏កំពុងបណ្តុះបណ្តាលសាស្ត្រាចារ្យផងដែរ ដើម្បីចែករំលែកចំណេះនេះបន្ត។

គុណ គួរចេតនា ជាអ្នកសារព័ត៌មានម្នាក់នៅកាសែតភ្នំពេញប៉ុស្តិ៍ ដែលបានចូលវគ្គបណ្តុះបណ្តាលពីផ្សារហ៊ុនបានឲ្យដឹងថា ដំបូងឡើយមានការលំបាក ព្រោះនេះជាមុខវិជ្ជាថ្មីសម្រាប់ពលរដ្ឋកម្ពុជាដូចជារូបគាត់។

ចេតនាបន្ថែមថា៖ «ពេលខ្ញុំចាប់ផ្តើមដំបូង ខ្ញុំមានអាម្មណ៍ថាប្លែកព្រោះជារឿងថ្មីសម្រាប់ខ្ញុំ។ ដំបូងខ្ញុំមិនយល់អី្វទៅជាផ្សារហ៊ុន និងអ្វីជាមូលបត្របំណុលទេ ប៉ុន្តែបន្ទាប់ពីបានចូលវគ្គនេះមកខ្ញុំយល់អស់ហើយ»។

ផ្សារមូលបត្រកម្ពុជាត្រូវបានពន្យារពេលពីរលើកហើយ មុននឹងឈានដល់ការសម្រេចចុងក្រោយនេះ។ ប៉ុន្តែការធ្វើពាណិជ្ជកម្មមិនទាន់ដំណើរការនៅឡើយទេ ដោយរង់ចាំរហូតចុងឆ្នាំ។

ថ្លែងក្នុងពិធីបើកសម្ពោធដាក់ឲ្យដំណើរការផ្សារមូលបត្រកម្ពុជា កាលពីថ្ងៃទី១១ កក្កដា លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា ការបើកផ្សារមូលបត្រពេលនេះជាប្រវត្តិសាស្ត្រថ្មីមួយក្នុង វិស័យហិរញ្ញវត្ថុកម្ពុជា និងសេដ្ឋកិច្ចជាតិទាំងមូល។ លោកបន្តថា៖ «នេះបង្ហាញឲ្យឃើញថា កម្ពុជាកំពុងឈានចូលដល់ដំណាក់កាលថ្មីមួយនៃការអភិវឌ្ឍវិស័យ ហរិញ្ញវត្ថុ ស្របតាមយុទ្ធសាស្ត្រអភិវឌ្ឍន៍វិស័យហិរញ្ញវត្ថុ ២០០៦-២០១៥»។

មកដល់ពេលនេះមានតែសហគ្រាសរដ្ឋចំនួនបីប៉ុណ្ណោះដែលអនុញ្ញតឲ្យចុះបញ្ចីនៅក្នុងផ្សារហ៊ុន។

អ្នកសេដ្ឋកិច្ចបាននិយាយថា ដំណើរឆ្ពោះទៅរកការបង្កើតផ្សារមូលបត្រជាសញ្ញាវិជ្ជមានសម្រាប់សេដ្ឋកចិ្ចកម្ពុជា។

លោក កង ច័ន្ទតារារ័ត្ន សាស្ត្រាចារ្យសេដ្ឋកិច្ចនៃសាកលវិទ្យាល័យពុទ្ធសាស្ត្រា និងជាប្រធាន វិទ្យាស្ថានកម្ពុជាដើម្បីសិក្សាអភិវឌ្ឍន៍បានឲ្យដឹងថា៖ «ការបង្កើតផ្សារហ៊ុនជាសញ្ញាវិជ្ជមាន ក្នុងការរួមចំណែកអភិវឌ្ឍសេដ្ឋកិច្ច ព្រោះតាមរយៈផ្សារហ៊ុន នឹងធ្វើឲ្យកម្ពុជាមានលទ្ធភាពប្រមែប្រមូលទុនមកដាក់ក្នុងសកម្ម ភាពសេដ្ឋកិច្ច ទាក់ទាញទុនបរទេសមកក្នុងប្រទេសនិងទប់ស្កាត់ការហូរចេញទុនពី កម្ពុជាទៅក្រៅផងដែរ»។

ទោះបីយ៉ាងណាក្តី លោក កង ច័ន្ទតារារ័ត្ន ថ្លែងថា ការលើកកម្ពស់ការយល់ដឹងជាសាធារណៈចំពោះផ្សារមូលបត្រក៏ជារឿង សំខាន់មួយដែរ។ លោកបន្ថែមថា៖ «យើងត្រូវធ្វើកំណែទម្រង់វិស័យសាធារណៈ និង ឯកជន។ ការយល់ដឹងរបស់សាធារណជនក៏នៅទាប។ យើងត្រូវការនីតិវិធីដ៏យូរអង្វែងទៀតដើម្បីលើកកម្ពស់ការយល់ ដឹងជាសាធារណៈ ដើម្បីឲ្យដំណើរការផ្សារហ៊ុនស្ថិតនៅក្រោមយន្តការលើកកម្ពស់ កំណើនសេដ្ឋកិច្ច» កញ្ញា សុភក្តី ជានិស្សិតម្នាក់ផ្សេងទៀតនិយាយថា គេមិនបានដឹងថា អ្វីទៅជាផ្សារហ៊ុននោះទេ។ សុភក្តីនិយាយថារូបគេក៏ចង់ដឹងពីអត្ថប្រយោជន៍នៃផ្សារហ៊ុនផង ដែរ៖ «ខ្ញុំគិតថាបើប្រទេសខ្មែរយើងបើកផ្សារហ៊ុន ប្រជាជនគួរតែបានយល់ពីវា ដូច្នេះពួកគេអាចដឹងពីគុណវិបត្តិ និងគុណប្រយោជន៍វា»៕

ប្រភព៖

ផ្សារភាគហ៊ុនកម្ពុជាប្រកាសបើកនៅថ្ងៃចន្ទ១១កក្កដានេះ ប៉ុន្តែការទិញលក់ភាគហ៊ុន អាចធ្វើឡើងនៅចុងឆ្នាំ

ម៉ូត ផល្លា — Thu, 14 Jul 2011 06:31:04 +0000

នៅថ្ងៃចន្ទទី១១ខែកក្កដានេះ រដ្ឋាភិបាលនៃប្រទេសកម្ពុជា ប្រកាសដាក់អោយដំណើរការផ្សារភាគហ៊ុន កម្ពុជាជាផ្លូវការប៉ុន្តែនេះជាការបើកផ្សារដំបូង។ តើអ្វីទៅជាផ្សារដំបូង? តើរដ្ឋាភិបាលចាប់ផ្តើមគិតគូរបើកផ្សារហ៊ុននេះតាំងពីពេល ណាមក? សូមអញ្ជើញស្តាប់បទសម្ភាសន៍រវាង គី សុខលីមនិងលោក បណ្ឌិត ឃង្ទី សំ អតីតសាស្ត្រាចារ្យហិរញ្ញវត្ថុនិងមូលបត្រនៅសហរដ្ឋអាមេរិកនិង បច្ចុប្បន្នជានាយករងនៃវិទ្យាស្ថានហិរញ្ញវត្ថុកម្ពុជា៕

ប្រភព៖

សហគ្រិនចំណាន ឬគ្រប់មាគ៌ាសុទ្ឋតែក្រាលមាស

ម៉ូត ផល្លា — Sun, 10 Jul 2011 05:52:26 +0000

លោកគឹម វូឈុងដែលជាប្រធានស្ថាបនិកនៃបណ្តុំសហគ្រាស ឌេវូ បាននិពន្ឋរឿងនេះឡើងក្នុងគោលបំណងចែករំលែកបទពិសោធន៍របស់លោក ចំពោះយុវជនកូរ៉េ និងយុវជនក្នុងពិភពលោកទាំងមូល។ សៀវភៅ សហគ្រិនចំណាន ឬគ្រប់មាគ៌ាសុទ្ឋតែក្រាលមាសបង្ហាញអំពីការត្រិះរិះពិចារណាទៅលើ ព្រឹត្តិការណ៍បច្ចុប្បន្នដែលមានជាអាទិ៍ឧក្រិដ្ឋកម្ម អត្ថប្រយោជន៍នៃការសិក្សាការងារ និងមុខតំណែងរបស់ស្រី្តក្នុងសង្គមជាតិ។ល។ ម៉្យាងទៀត សៀវភៅនេះក៏បង្ហាញផងដែរអំពីរបៀបចាត់ចែងគ្រប់គ្រងប្រកបដោយលក្ខណៈ ថ្មីទាំងស្រុងតែមានប្រសិទ្ឋភាព។

ប្រាកដណាស់ថា សៀវភៅនេះតម្រូវជាបឋមចំពោះយុវជនកូរ៉េ ប៉ុន្តែលោកគឹម វូឈុងយល់ថា ទោះជា នៅក្នុងប្រទេសណា ឬកំពស់វឌ្ឍនភាពខុសគ្នាក្នុង ប្រទេសនីមួយៗក្តីយុវជនណាក៏ត្រូវការដំបូន្មានត្រូវការគេជួយណែនាំ ផ្លូវដែរ។ គេត្រូវការភាពស្វាហាប់ និងថាមពលដើម្បីប្រឈមមុខតតាំងនឹងស្ថានភាពអាថ៌កំបាំងក្នុងការស្វែង រកជើងមេឃថ្មី។ យុវជនត្រូវការថែមទៀតនូវសេចក្តីសង្ឃឹម និងគម្រោងការសម្រាប់អនាគត។ រឹតតែសំខាន់ជាងនេះទៅទៀត យុវជនមានចំណង់នឹងពង្រីកទស្សនៈដ៏មានផលប្រយោជន៍ក្នុងករណីទទួលខុស ត្រូវដើម្បីធ្វើឲ្យមានអនាគត និងឲ្យពិភពលោកល្អប្រសើរ។ ពុំមានអ្វីដែលធ្វើពុំបាននោះទេ កាលណាបើ គេទុកចិត្ត តាំងចិត្ត និងជឿជាក់។ កាលណាអ្នកមានការទុកចិត្ត និងមានគំនិតប្រាកដនិយមនោះ គ្មានអ្វីជំទាស់ជាឧបសគ្គឡើយ។ មានឱកាសច្រើនណាស់ដែលលាក់ខ្លួនបំពួនអាត្មារង់ចាំឲ្យអ្នករកឃើញ ប៉ុណ្ណោះ។

យ៉ាងណាមិញ ជីវិតបើកទា្វរចំពោះ៖

- ជនណាដែលមានគំនិតប្រាកដនិយម

- ជនណាដែលមានការទុកចិត្ត និងជំនឿ

- ជនណាដែលចេះជំនះឆាកជីវិតយ៉ាងស្វាហាប់។

លោក គឹម វូឈុងមានដើមកំណើតក្រីក្រគ្មានទ្រព្យទេ ប៉ុន្តែ លោកមានការស្រមៃ មានគំនិតគិតគូរ មានការតាំងចិត្តយ៉ាងមោះមុតដោយជឿជាក់ គួបផ្សំ និងគំនិតសុទិដ្ឋនិយម។ល។ លោកក៏បានក្លាយទៅជាសហគ្រិនចំណានមួយរូបនៃប្រទេសកូរ៉េខាងត្បូង។ សៀវភៅរបស់លោកជាមេរៀនជីវិតដ៏ល្អពិតៗដែលលោកគឹម ខូវនី អតីតសាស្ត្រាចារ្យនៃមហាវិទ្យាល័យពាណិជ្ជសាស្ត្រ នៅទីក្រុងភ្នំពេញបានពេញចិត្តប្រែសម្រួលជាភាសាខ្មែរ បន្ទាប់ពីសៀវភៅនេះបានប្រែជាភាសាអន្តរជាតិរួចទៅហើយ។

សូមចុចដើម្បីស្តាប់៖

ប្រភព៖

តួនាទី ក្រុមហ៊ុនឈ្មួញជើងសាមូលបត្រ

ម៉ូត ផល្លា — Fri, 08 Jul 2011 13:31:05 +0000

ទីផ្សារមូលបត្រកម្ពុជានឹងត្រូវចាប់ផ្តើមបើកទ្វារ នៅថ្ងៃចន្ទ ទី១១ កក្កដា សប្តាហ៍ក្រោយនេះហើយ ក៏ប៉ុន្តែ ប្រជាជនកម្ពុជាហាក់ដូចជានៅមិនទាន់យល់ដឹងច្បាស់លាស់នៅឡើយទេ អំពីដំណើរការនៃការទិញ-លក់មូលបត្រ។ នៅក្នុងនាទីភ្ញៀវប្រចាំសប្តាហ៍របស់យើង នៅថ្ងៃនេះ សេង ឌីណា ជួបសម្ភាសន៍ជាមួយលោក សន សុខណា អគ្គនាយកក្រុមហ៊ុនមូលបត្រសូណាត្រា (Sonatra Securities) ដើម្បីស្វែងយល់អំពីក្រុមហ៊ុនឈ្មួញជើងសាមូលបត្រ។

តើឈ្មួញជើងសាមូលបត្រមានតួនាទីអ្វីខ្លះ? តើហេតុអ្វីអ្នកវិនិយោគមូលបត្រត្រូវធ្វើការទិញ-លក់មូលបត្រតាម រយៈឈ្មួញជើងសា? តើត្រូវបំពេញលក្ខខណ្ឌអ្វីខ្លះ ដើម្បីអាចទិញដូរមូលបត្រតាមរយៈឈ្មួញជើងសាមូលបត្របាន?

ដោយ សេង ឌីណា

ប្រភព៖

ផ្សារមូលបត្រកម្ពុជាចាប់បើកទ្វារនៅថ្ងៃទី១១កក្កដា២០១១

ម៉ូត ផល្លា — Fri, 08 Jul 2011 09:58:51 +0000

រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានប្រកាសថា ផ្សារមូលបត្រកម្ពុជានឹងបើកទ្វារ នៅថ្ងៃទី១១កក្កដា២០០១នេះហើយ តាមការគ្រោងទុក ហើយថា នឹងមានភាគហ៊ុនក្រុមហ៊ុនរបស់រដ្ឋចំនួន២ ដែលនឹងចាប់ផ្តើមនៅក្នុងទីផ្សារនេះ។ លោកគាត ឈន់ថ្លែងយ៉ាងនេះ នៅក្នុងពិធីសម្ពោធក្រុមហ៊ុនមូលបត្រ SONATRA ដែលនឹងក្លាយជាក្រុមហ៊ុនឈ្មួញជើងសាមូលបត្រ។

ប្រភព៖ http://www.khmer.rfi.fr/cambodia-stock-exchange-set-to-open

ដោយ លាង ដឺលុច

តើគួរធ្វើជាថៅកែ ឬគួរធ្វើជាបុគ្គលិកសាមញ្ញ?

ម៉ូត ផល្លា — Fri, 08 Jul 2011 09:50:46 +0000

មនុស្សគ្រប់រូបតែងតែប្រាថ្នាចង់ដឹកនាំ និងចង់កាន់កាប់មុខរបរដោយ ខ្លួនឯង ប៉ុន្តែពួកគេមួយចំនួនមិនទាន់យល់ថា ការកាន់កាប់មុខរបរមួយដោយខ្លួនឯងគឺជាការធ្វើពលីកម្មធំធេងនោះទេ។ ជាបុគ្គលិកធ្វើការតែ៨ម៉ោងក្នុងមួយថ្ងៃ ប៉ុន្តែជាថៅកែវិញ ពួកគេបង្ខំចិត្តធ្វើការគ្រប់ទីកន្លែងនិងគ្មានម៉ោងឈប់។

ប្រភព៖ http://www.khmer.rfi.fr/Become%20an%20enterpreneur%20is%20not%20easy

Call មកបង ពេលគេបោះបង់អូន, Covered by Phalla

ម៉ូត ផល្លា — Wed, 06 Jul 2011 13:32:35 +0000

Acoustic guitar covered by Phalla
Chords:
I- Em D Em C D G C D Bm Em C D Em
II- Em D Em C D G C D Bm Em C D Em
R- G D Em D C Bm Am D G D Em D C Bm Am D G
Solo (I, II, Rx2)

ក្រុមហ៊ុនលំដាប់ពិភពលោករបស់ជប៉ុន កំពុងតែសម្លឹងការវិនិយោគនៅកម្ពុជា

ម៉ូត ផល្លា — Thu, 02 Jun 2011 18:39:41 +0000

ភ្នំពេញៈ Nidec corp ជាក្រុមហ៊ុនដ៏ធំរបស់ជប៉ុនបានបង្ហាញពីបំណងធ្វើការវិនិយោគ លើវិស័យព័ត៌មានវិទ្យានៅកម្ពុជា។ នេះបើតាមលោក អ៊ាង សុផល្លែត ជំនួយការផ្ទាល់របស់នាយករដ្ឋមន្ត្រីហ៊ុន សែន ឲ្យដឹងពីល្ងាចថ្ងៃអង្គារ។

ថ្លែងទៅកាន់អ្នកសារព័ត៌មានបន្ទាប់ពីកិច្ចប្រជុំរវាងនាយក រដ្ឋមន្រីហ៊ុន សែន និងលោក Shi-genobu Nagamori ប្រធាន និងជាអគ្គនាយកក្រុមហ៊ុន Nidec Corp ជាក្រុមហ៊ុនដ៏មួយក្នុងពិភពលោកមានមូលដ្ឋាននៅទីក្រុងតូក្យូ ខាងផ្នែកផលិត hard dish ឬ DVD លោក អ៊ាង សុផល្លែតឲ្យដឹងថា ក្រុមហ៊ុននេះមានបំណងវិនិយោគនៅកម្ពុជា បន្ទាប់ពីបានវិនិយោគនៅថៃ និងវៀតណាម។

តាមលោក អ៊ាង សុផល្លែត លោក Shigenobu Nagamori និយាយទៅកាន់លោកនាយករដ្ឋមន្ត្រីហ៊ុន សែន ថា៖ «ខ្ញុំបានធ្វើដំណើរមកកម្ពុជាពេលនេះគឺដើម្បីបង្ហាញពីឆន្ទៈ របស់ខ្ញុំក្នុងការវិនិយោគលើវិស័យបច្ចេកវិទ្យា»។

ក្រុមហ៊ុន Nidec Corp បានដំណើរការនៅក្នុងប្រទេសចំនួន២៨ ទូទាំងពិភពលោក ដែលមានបុគ្គិលសរុប ១៣០ ០០០នាក់ ហើយនៅឆ្នាំ២០១០ ក្រុមហ៊ុន Nidec Corp រកប្រាក់ចំណូលបាន៨,៥ពាន់លានដុល្លារ។ នេះបើតាមលោក អ៊ាង សុផល្លែត។

លោក បន្តថា លោកនាយករដ្ឋមន្ត្រីបានបង្ហាញពីការគាំទ្រនិងស្វាគមន៍ចំពោះគម្រោង វិនិយោគនៅ កម្ពុជា ហើយបានជំរុញឲ្យក្រុមហ៊ុន Nidec បន្តកិច្ចពិភាក្សាជាមួយក្រុមប្រឹក្សាអភិវឌ្ឍន៍កម្ពុជា (CDC)។ លោកបានបន្តទៀតថា៖«គាត់ [លោក Shigenobu Nagamori ] មានបំណងមកវិនិយោគក្នុងប្រទេសកម្ពុជាយ៉ាងពិតប្រាកដ»។

តាមតួលេខពី CDC ការវិនិយោគរបស់ជប៉ុននៅកម្ពុជានៅតែមានកម្រិតទាបនៅឡើយ ដោយមានទំហំវិនិយោគតែ៥លានដុល្លារប៉ុណ្ណោះកាលពីឆ្នាំ២០០៩ ហើយកាលពី២០១០ ពុំមានវិនិយោគពីប្រទេសជប៉ុនទេ។

លោ ឌុយ ថូវ អគ្គលេខាធិការរង CDC បានឲ្យដឹងថា វិនិយោគជប៉ុននឹងហូរមកកម្ពុជាបន្ទាប់ពីកម្ពុជាមានច្បាប់វិនិយោគ គ្រប់គ្រាន់ ហើយប្រទេសទាំងពីរបានចុះអនុស្សរណៈយោគយល់គ្នាស្តីពីការលើក កម្ពស់វិនិយោគនៅកម្ពុជា។ លោកបន្តថា៖ «នៅអនាគតឆាប់ៗនេះវិនិយោគមកពីជប៉ុននឹងចូលមក។ យើងបានបង្កើតគណៈកម្មការរួមរវាងជប៉ុន និងកម្ពុជា ដើម្បីជំរុញវិនិយោគ ហើយយើងនឹងសម្រួល និងលើកទឹកចិត្តពួកគេ»។

ជប៉ុនជាប្រទេសផ្តល់ជំនួយនាំមុខគេដល់កម្ពុជាផ្នែកអភិវឌ្ឍន៍ សេដ្ឋកិច្ច និងសង្គម ដែលមានទឹកប្រាក់ប្រហែល១០០លានដុល្លារជារៀងរាល់មួយឆ្នាំៗ៕ SS

ប្រភព៖

ប្លកផល្លា

ការដំឡើង​ថ្លៃ​ទំនិញ និង​សេវាកម្ម​នៅ​ពេល​បុណ្យ​ទាន​ធំៗ នៅតែ​ចោទ​ជា​បញ្ហា

ក្រសួង​អប់រំ​មិន​បញ្ជូន​សិស្ស​ពូកែ​ទៅ​ប្រឡង​នៅ​បរទេស

ផ្សារ​មូលបត្រ​កម្ពុជា​ចាប់​កំណើត​ ប៉ុន្តែ​ការ​យល់​ដឹង​របស់​សាធារណជន​មាន​កម្រិត​ទាប​នៅ​ឡើ​យ

សហគ្រិន​ចំណាន ឬ​គ្រប់​មាគ៌ា​សុទ្ឋ​តែ​ក្រាល​មាស

តួនាទី​ ក្រុមហ៊ុន​ឈ្មួញ​ជើងសាមូលបត្រ

ផ្សារមូលបត្រ​កម្ពុជា​ចាប់​បើកទ្វារ​​នៅ​ថ្ងៃទី១១​កក្កដា​២០១១

តើ​គួរ​ធ្វើ​ជា​ថៅកែ​ ឬ​គួរ​ធ្វើ​ជា​បុគ្គលិក​សាមញ្ញ?

Call មកបង ពេលគេបោះបង់អូន, Covered by Phalla

ក្រុម​ហ៊ុន​លំដាប់​ពិភព​លោក​របស់​ជប៉ុន ​កំពុង​តែ​សម្លឹង​ការ​វិនិយោគ​នៅ​កម្ពុជា

ការដំឡើងថ្លៃទំនិញ និងសេវាកម្មនៅពេលបុណ្យទានធំៗ នៅតែចោទជាបញ្ហា

ក្រសួងអប់រំមិនបញ្ជូនសិស្សពូកែទៅប្រឡងនៅបរទេស

ផ្សារមូលបត្រកម្ពុជាចាប់កំណើត ប៉ុន្តែការយល់ដឹងរបស់សាធារណជនមានកម្រិតទាបនៅឡើយ

សហគ្រិនចំណាន ឬគ្រប់មាគ៌ាសុទ្ឋតែក្រាលមាស

តួនាទី ក្រុមហ៊ុនឈ្មួញជើងសាមូលបត្រ

ផ្សារមូលបត្រកម្ពុជាចាប់បើកទ្វារនៅថ្ងៃទី១១កក្កដា២០១១

តើគួរធ្វើជាថៅកែ ឬគួរធ្វើជាបុគ្គលិកសាមញ្ញ?

ក្រុមហ៊ុនលំដាប់ពិភពលោករបស់ជប៉ុន កំពុងតែសម្លឹងការវិនិយោគនៅកម្ពុជា